എവിടെയാണെന്റെ ദൈവം?

ഉണങ്ങിവരണ്ട നീർച്ചാലുകൾ തുറന്നു,
അടഞ്ഞുപോയ ഉറവകളും

വെള്ളം കുതിച്ചൊഴുകുമ്പോൾ
മലകൾ ഇടിഞ്ഞു താഴുമ്പോൾ
നിസ്സഹായനെന്ന പോലെ
നമ്മുടെ കൂടെ നോക്കിനിൽക്കുന്ന ദൈവം.
എനിക്ക് പരാതിയില്ല,
എന്നെ അവൻ സഹയാത്രികനാക്കി
കാരണം സർവ്വശക്തനായി കരുതാൻ എനിക്കിഷ്ടമില്ലായിരുന്നു.

ഉത്തരങ്ങളും അത്ഭുതങ്ങളും കാണിക്കാൻ
മനസ്സില്ലെന്ന് ദൈവം പറഞ്ഞു.

പിന്നെ ഈശ്വരനെ ഞാൻ  കണ്ടില്ല

മറ്റൊന്ന് ഞാൻ കണ്ടു
ഉണങ്ങിവരണ്ട നീർച്ചാലുകൾ തുറന്നു,
അടഞ്ഞുപോയ ഉറവകളും
രാഷ്ട്രീയവും മതവും
ഹൃദയനന്മയെ അടച്ചുകളഞ്ഞ കല്ലുകൾ
ഉറവകളുടെ നനവിൽ ഇളകിയടർന്നു
ഒരുമയായി നന്മയായി കരുണയായി അതൊഴുകി

അപേക്ഷകളുണ്ടായിരുന്നു,
വിതുമ്പലുകളുണ്ടായിരുന്നു
എങ്കിലും പരാതിപ്പെട്ടില്ലാരും
ആശയോടെ ഹൃദയങ്ങൾ പരസ്പരം നോക്കി.

ഉണങ്ങിവരണ്ട നീർച്ചാലുകൾ തുറന്നു,
അടഞ്ഞുപോയ ഉറവകളും
കണ്ണീരിന്റെ മറയിലും,
സഹായവുമായി നീണ്ട വിറങ്ങലിച്ച കൈയിലും
എവിടെയോ അവർ അറിഞ്ഞു
അകലാത്ത ഈശ്വര ചൈതന്യം.