Gentle Dew Drop

നവംബർ 15, 2026

താലന്തുകളുടെ വർദ്ധനവുണ്ടാകുന്നത്

താലന്തുകളുടെ വർദ്ധനവുണ്ടാകുന്നത് കൃപയലിയിച്ചു ചേർത്ത്  ജീവിതത്തിനു നൽകാൻ കഴിയുന്ന മേന്മയിലാണ്. പത്തു കൂടി, അഞ്ചു കൂടി എന്നത് ഒരല്പം കൂടി ആഴപ്പെടാൻ കഴിഞ്ഞ നന്മ, ദയ, കരുണ, സ്നേഹം വിശ്വസ്തത എന്നിവയൊക്കെയാണ്. അത് ചേർത്തുവെച്ചുകൊണ്ട് ഈ വാക്യങ്ങൾ കേൾക്കണം "ചെറിയ കാര്യങ്ങളിൽ വിശ്വസ്തനായിരുന്നതിനാൽ വലിയ കാര്യങ്ങളിലും നീ വിശ്വസ്തനായിരിക്കും." അവിശ്വസ്തനായ കാര്യസ്ഥന്റെ  ഉപമയിലെ പാഠം ക്രിസ്തു അവതരിപ്പിച്ചത് ഇങ്ങനെയാണ്: "ഭൗമികമായതിൽ വിശ്വസ്തരാകുവാൻ കഴിയുന്നില്ലെങ്കിൽ യഥാർത്ഥ ധനം ആര് നിങ്ങളെ ഏല്പിക്കും?"

ക്രിസ്തീയജീവിത ശൈലിയുടെ ആഴങ്ങൾ അത് പറഞ്ഞുതരുന്നുണ്ട്. അത് മായികമായ ആത്മീയലോകത്ത് വ്യഹരിക്കാൻ നമ്മെ കൂട്ടിക്കൊണ്ടു പോകുന്നതല്ല. കൃപയോടെ എന്ത് നമ്മൾ പരിപോഷിപ്പിച്ചു, വളർത്തി, ഫലം കണ്ടു? ക്രിസ്തീയ ആത്മീയത പ്രാപഞ്ചികരഹസ്യങ്ങളുടെ പാരമ്യതയിലേക്കു ലയിക്കാനായിട്ടല്ല സ്വയം ശൂന്യവത്കരണത്തിലൂടെ, അനേകർക്കായി വിഭജിക്കപ്പെടുന്ന ജീവിതത്തിലും അങ്ങനെ വർദ്ധിപ്പിക്കപ്പെടുന്ന താലന്തുകളിലും 'ദൈവം നമ്മോടു കൂടെ' എന്ന അനുഭവം സത്യമാകുന്നതാണ് ക്രിസ്തീയ ജീവിതശൈലി. കുടുംബങ്ങളും സമൂഹവും ക്രിസ്തുവിന്റെ വെളിപാടിന് യോഗ്യമായ ഇടങ്ങളാകും. 

നവംബർ 14, 2026

നുഴന്നുകയറ്റക്കാർ

വെറുക്കുക എന്നത് അത്യന്താപേക്ഷിതമായ ആത്മീയ ആഭിമുഖ്യമായും മതശൈലിയായും ഉറപ്പിക്കപ്പെട്ടതിനു ശേഷം നമ്മുടെ സമൂഹത്തിൽ കൂടുതൽ തെളിയുന്ന ഒരു സമീപനരീതിയാണ് നമ്മൾ തുല്യരല്ല എന്നത്. ഞങ്ങൾ വരേണ്യരും അവർ താഴ്ന്നവരും ആണ്, ഞങ്ങൾ തികഞ്ഞ ശുദ്ധരും അവർ ശത്രുക്കളുമാണ്, ഞങ്ങൾ ഈ നാട്ടുകാരും അവരെല്ലാം നുഴഞ്ഞു കയറ്റക്കാരുമാണ്. 

ആഴങ്ങളിൽ

ആഴങ്ങൾക്കു പകരം ആവേശമാണ് മതങ്ങൾ നൽകുന്നതും അവയിൽ നിന്ന് പ്രതീക്ഷിക്കപ്പെടുന്നതുമെങ്കിൽ അവ ആന്തരിക പ്രേരക ശക്തി നഷ്ടപ്പെടുത്തിയിരിക്കുന്നു. 

ഭക്തി ലഹരി, ജനക്കൂട്ടം ഒരുമിച്ചു സൃഷ്ടിക്കുന്ന മാസ്മരികത, ആദർശങ്ങളുടെ തീക്ഷ്ണാഗ്നി, കൂടെ മുദ്രാവാക്യങ്ങളാക്കപ്പടുന്ന വിശ്വാസപ്രഘോഷങ്ങൾ, വിദ്വേഷപ്രചരണങ്ങൾ തുടങ്ങിയവ മതത്തിന്റെ ആന്തരിക ദർശനത്തെ മറച്ചുകളയുന്നു. 

'തിരികെപ്പിടിക്കുക' എന്ന് പലപ്പോഴും വിശ്വാസത്തെക്കുറിച്ചു പറയാറുണ്ട്. തിരികെ തേടിപ്പിടിക്കാനായി അത് പണ്ടെങ്ങോ തങ്ങി നില്കുന്നതതല്ല. പഴമയുടെ കാല്പനികതയിൽ തിരിച്ചറിയപ്പെടാവുന്ന ഒന്നല്ല വിശ്വാസത്തിന്റെ വെളിച്ചം. നമ്മെ അനുഗമിക്കുന്ന ആഴമാണത്. ഞാൻ എന്ന സകലതിനേയും - ചിന്താധാരകൾ, മൗലികതകൾ, ദൈവസങ്കല്പങ്ങൾ എല്ലാം - ശൂന്യവത്കരിച്ചുകൊണ്ട് പ്രവേശിക്കേണ്ട ആഴം. എങ്കിലേ, മതവും ദൈവവും വിഗ്രഹമായി ചുരുങ്ങാതെ സത്യവും സൗന്ദര്യവുമായി ഹൃദയത്തിന്റെ ആഴങ്ങളിൽ തെളിയൂ.

നവംബർ 01, 2026

ചരിത്രപുനഃസൃഷ്ടികളും ക്രിസ്തീയ സാക്ഷ്യവും

വേളാങ്കണ്ണിയെയും മലയാറ്റൂരിനെയും കുറിച്ചുള്ള പുതിയ ചരിത്രപാഠങ്ങൾ അവതരിപ്പിക്കപ്പെടുമ്പോൾ, അതിനെക്കുറിച്ചുണ്ടാവേണ്ട ക്രിസ്തീയ പ്രതികരണങ്ങൾ ക്രിസ്തീയ ശൈലിയുള്ളതാവണമെന്ന അഭിപ്രായമാണ് എനിക്കുള്ളത്. "നിങ്ങളുടെ ദൈവങ്ങൾ, നിങ്ങളുടെ ചരിത്രം, നിങ്ങളുടെ ആരാധനാ സ്ഥലങ്ങൾ ... " മറുചോദ്യങ്ങളാക്കപ്പെടേണ്ടവയല്ല. ഏതു തരം ചരിത്രബോധത്തിൽ നിന്നു കൊണ്ട്, ചരിത്രപരമായ വസ്തുതകളിലേക്ക് ഏറ്റവുമടുത്ത് എത്തിച്ചേരാനാകുമെന്ന് പരിശോധിക്കാം. പരമ്പരാഗത വിശ്വാസങ്ങളും പ്രാദേശിക ആചാരശൈലികളും മറ്റും ഒത്തുചേർത്തു വെച്ചുകൂടിയെ ചരിത്രത്തിന്റെ സത്യാവസ്ഥ വെളിപ്പെടാറുള്ളു.

ചരിത്രാന്വേഷി നില്കുന്നത് 'ഇന്നി'ലാണെങ്കിലും തേടപ്പെടുന്നത് 'അന്ന'ത്തെ കാലവും മനുഷ്യരും അവരുടെ തകർച്ചകളും നേട്ടങ്ങളും കൂടിയാണ്. തിരയപ്പെടുന്ന ചരിത്ര യാഥാർത്ഥ്യം ആ കാലത്തിനും മനുഷ്യർക്കും എന്ത് നൽകി മുന്നോട്ടു നയിച്ച് എന്ന് കൂടി ശുദ്ധഹൃദയത്തോടെ പരിശോധിക്കണം. എങ്കിലേ ഇന്നിലെ ചരിത്രപാഠങ്ങൾക്ക് 'നമുക്കും' 'അവർക്കു'മായുള്ള സ്പഷ്ടത ലഭിക്കൂ.
പ്രധാനമായ ഒരു കാര്യം, പുതിയ ചരിത്രപാഠങ്ങൾ ചരിത്രത്തെക്കുറിച്ചോ മതത്തെക്കുറിച്ചോ അല്ല എന്നതാണ്. ചരിത്രത്തിനു നൽകുന്ന പുനഃസൃഷ്ടി, അത് മതപരമോ സാംസ്കാരികമോ ആവട്ടെ, രാഷ്ട്രീയവൽക്കരണത്തിന്റെ ഉപകരണമാണ്. മത-വിശ്വാസ ചരിത്രം മതത്തെയും വിശ്വാസികളെയും ഒരുമിച്ചു നിർത്തുന്ന plausibility structure ന്റെ ഒരു ഘടകമാണ്. രാഷ്ട്രീയ ലാഭത്തിനോ മതമൗലികതക്കോ വേണ്ടി എളുപ്പം ദുരുപയോഗം ചെയ്യപ്പെടാവുന്ന ഘടകങ്ങളിൽ ഒന്ന്. പ്രതികരണങ്ങളും വിശദീകരണങ്ങളും വിസ്തൃതമായ ഈ സംവിധാനത്തെ കാണുന്നില്ലെങ്കിൽ ഫലവത്താകുന്നതല്ല.
ശത്രുത വളർത്തുന്ന രാഷ്ട്രീയ അജണ്ടകൾക്ക് വഴങ്ങി കൊടുക്കാതിരിക്കുക എന്നത് തന്നെ വലിയൊരു പ്രതിരോധമാണ്. വിശ്വാസിസമൂഹം തങ്ങളുടെ തന്നെ പാരമ്പര്യത്തെയും ചരിത്രത്തെയും കുറിച്ച് കൃത്യമായ ബോധ്യമുള്ളവരായിരിക്കണം. അവയും ചരിത്രനിർമ്മിതികളാകാതിരിക്കാൻ പരമാവധി ശ്രദ്ധിക്കണം. ചരിത്ര പുനഃസൃഷ്ടികൾ രാഷ്ട്രീയ ലാഭത്തിനായി ഉപയോഗിക്കപ്പെടുമ്പോൾ, സമൂഹത്തിൽ ഭിന്നത ഉണ്ടാകാതിരിക്കാൻ ഇതര മതവിഭാഗങ്ങളുമായുള്ള നല്ല ബന്ധങ്ങളും സൗഹാർദ്ദപരമായ സംവാദങ്ങളും ഊട്ടിയുറപ്പിക്കേണ്ടതുണ്ട്. ചുരുക്കം ചിലരുടെ ചിന്തകൾ വിഷലിപ്തമാണെങ്കിലും 'അവർ' എല്ലാവരും 'അങ്ങനെ ചിന്തിക്കുന്നവരാണ് എന്ന ചിന്ത ന്യായമല്ല. ആത്മീയമായ ആ ആഴത്തെയും ചരിത്രപരമായ സത്യത്തെയും സമചിത്തതയോടെയും സ്നേഹത്തോടെയും ഉയർത്തിപ്പിടിക്കുമ്പോൾ മാത്രമേ രാഷ്ട്രീയ താൽപ്പര്യങ്ങളാൽ ചമയ്ക്കപ്പെടുന്ന പുതിയ 'ചരിത്രപാഠങ്ങൾക്ക്' മുന്നിൽ ക്രിസ്തീയ സാക്ഷ്യം പരാജയപ്പെടാതിരിക്കൂ.
മറുവശത്ത്, എല്ലാ മതങ്ങളിലും ആധുനിക കാലത്ത് വിശ്വാസം, മതം, സംസ്കാരം, ആചാരങ്ങൾ, പാരമ്പര്യങ്ങൾ ഇവയൊക്കെ പുതുഭാഷ്യങ്ങൾ നല്കപ്പെട്ടിട്ടുണ്ട്. അത് ആത്മീയ നവീനതയെക്കുറിച്ചോ മതത്തിന്റെ ഉള്കാഴ്ചയെ തിരിച്ചറിയുന്നതിനെക്കുറിച്ചോ അല്ല, മറിച്ച് അധികാരം നൽകുന്ന ലാഭങ്ങളെക്കുറിച്ചാണ്. അത് സ്വന്തം സമൂഹത്തിനു പോലും ശോഷണമാണ് വരുത്തി വയ്ക്കുന്നതെന്ന് തിരിച്ചറിയാൻ അനുവദിക്കാത്ത വിധം മേല്പറഞ്ഞ plausibility structures അഴിച്ചുപണിയപ്പെട്ടു എന്നത് വിശ്വാസികൾ, ഏതു മതത്തിന്റെയുമാകട്ടെ, മനസിലാക്കേണ്ടതുണ്ട്. എന്നാൽ ഈ പ്രക്രിയയെ 'വിശുദ്ധീകരണം' എന്നാണ് വിളിച്ചത് എന്നതാണ് വിരോധാഭാസം.