സഭയുടെ ശിരസാണ് ക്രിസ്തു എന്നതിനെ സഭയുടെ മനസ് ക്രിസ്തുവാണ്, അവിടുത്തെ മനോഭാവങ്ങളാണ് സഭയെ നയിക്കുന്നത് എന്ന് മനസ്സിലാക്കുമ്പോൾ 'തലപ്പത്തു നിന്ന് നിയന്ത്രിക്കുന്നവനാണ്' ക്രിസ്തു എന്ന് ധരിക്കുന്നതിൽ നിന്നും വ്യത്യസ്തമായ ഒരു സഭാദര്ശനമാണ് ലഭിക്കുക. സഭ എന്തായിത്തീരാൻ ആഗ്രഹിച്ചു പ്രയത്നിക്കുന്നെന്നും, ഓരോ അംഗത്തിലും പ്രകടമാക്കുന്ന വ്യത്യസ്തമായ വരദാനങ്ങളിലൂടെ ദൈവജനമധ്യേ വെളിപ്പെടുന്ന ക്രിസ്തുവിനെ ഒന്ന് ചേർന്ന് ആരാധിക്കുന്നെന്നും ഇത് പറഞ്ഞു തരുന്നു.
സഭയെ നയിക്കാൻ ക്രിസ്തുവിനു കഴിവ് പോരെന്നും ക്രിസ്തുവിന്റെ കാഴ്ചപ്പാടുകൾക്ക് ശക്തിയും സൗന്ദര്യവും കുറവാണെന്നും കരുതാൻ തുടങ്ങിക്കഴിഞ്ഞ നമുക്ക് അക്രിസ്തീയമായ മൂല്യങ്ങളും സമീപനരീതികളും 'സഭയുടെ നന്മക്കായി' ചേർത്തുവയ്ക്കാൻ കഴിയുന്നത് ആശ്ചര്യമല്ല. ക്രിസ്തുവിനെ ഉപേക്ഷിച്ചു കളഞ്ഞ സഭക്ക് ക്രിസ്തുവല്ല ശിരസ് എന്നത് ധ്യാനിക്കേണ്ടതാണ്. എങ്കിലും അവ ക്രിസ്തുവിന്റെ പേരിലാണെന്നതാണ് ക്രിസ്തുവിനും സഭക്കും യഥാർത്ഥ വേദന.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ