വിശ്വാസം നൽകുന്ന ഉറപ്പ്

വിശ്വാസത്തിൽ നിന്ന് ലഭ്യമാകുന്ന ഉറപ്പ് ക്രിസ്തുവിലുള്ള ജീവിതത്തെക്കുറിച്ചുള്ള ഉറപ്പാണ്. ജീവിതം അന്വേഷിക്കുന്ന സത്യവും, സർഗ്ഗസൗന്ദര്യവും നന്മയും, സേവനത്തിലും ഭക്തിയിലുമുള്ള ശൂന്യവത്കരണ ലാവണ്യവും ക്രിസ്തുവിൽ സജീവത കണ്ടെത്തുന്നു എന്ന ഉറപ്പ്. രക്ഷയുടെ സമഗ്രതയും ക്രിസ്തുവിലുള്ള കൂട്ടായ്മയും അതിന്റെ ഭാഗമാണ്. ശാസ്ത്രനിരീക്ഷണങ്ങളോ ചരിത്ര ഗവേഷണങ്ങളോ ഈ ഉറപ്പു മൂലം നിരാകരിക്കപ്പെടുകയോ അസാധുവാക്കപ്പെടുകയോ ചെയ്യുന്നില്ല. വിശ്വാസമായാലും ശാസ്ത്രമായാലും absolutism അവകാശപ്പെടുന്നിടത്ത് അവ സ്വയം അടയ്ക്കുകയാണ്.

വിശ്വാസം നൽകുന്ന ഉറപ്പ്, ആറ്റോമിക സിദ്ധാന്തത്തെക്കുറിച്ചോ പ്രപഞ്ചത്തിന്റെ പരിണാമത്തെക്കുറിച്ചോ അവസാനവാക്കാവേണ്ടവയല്ല. ശാസ്ത്രം അതിന്റെ രീതിശാസ്ത്രത്തെ സൂക്ഷ്മതയോടെ പാലിക്കുമ്പോഴാണ് അത് വിശ്വസനീയമാകുന്നത്. ആറ്റോമിക ഘടനയെക്കുറിച്ചും പ്രപഞ്ചത്തിന്റെ ഘടനയെയും വികാസത്തെയും സംബന്ധിച്ചും മനുഷ്യനുള്ള അറിവുകൾ വളരുകയും കൂടുതൽ വ്യാപ്തിയുള്ളതാവുകയും ചെയ്തിട്ടുണ്ട്. മനുഷ്യന്റെ പ്രകൃത്യാ ഉള്ള സ്വഭാവത്തെക്കുറിച്ചും, മനസിനെക്കുറിച്ചും അത്തരത്തിൽ വ്യക്തമായ അറിവുകൾ ലഭ്യമാക്കുന്നുണ്ട്. ഈ മാറ്റങ്ങൾ ഉള്ളതുകൊണ്ട്, തൂണുകളാൽ താങ്ങി നിർത്തപ്പെട്ടിരിക്കുന്ന പരന്ന പ്രതലമായ ഭൂമിയെ പ്രപഞ്ച സത്യമായി സ്വീകരിക്കണമെന്ന് വിശ്വാസം നൽകുന്ന 'ഉറപ്പ്' പ്രേരിപ്പിക്കുന്നില്ല. സർവ്വജ്ഞാനിയും സത്ഗുണസമ്പന്നനുമായ ആദം വർഷങ്ങൾക്കു മുമ്പ് ജീവിച്ചു എന്ന് കരുതാനും വിശ്വാസം നൽകുന്ന 'ഉറപ്പ്' പ്രേരിപ്പിക്കുന്നില്ല.

പുതുതായി ലഭ്യമാകുന്ന അറിവുകളെ സ്വീകരിക്കുക എന്നത് ബലഹീനതയല്ല, പക്വതയും വളർച്ചയുമാണ്. ഈ അനിശ്ചിതത്വത്തെ അഭിമുഖീകരിക്കാൻ കഴിയാതാവുന്നത് ഒരുപക്ഷേ ബൗദ്ധികമായ ഒരു സുരക്ഷിതബോധത്തിനുവേണ്ടിയാകാം. ആ സുരക്ഷക്ക് വേണ്ടി അരിസ്റോട്ടിലിന്റെയും, പ്ലേറ്റോയുടെയും, ബൈബിൾ ലോകവീക്ഷണങ്ങളുടെയും കാഴ്ചപ്പാടുകളിലേക്കുള്ള പിൻവാങ്ങൽ വിശ്വാസത്തിന്റെ ഉറപ്പിനെ തളർത്തുകയാണ്. വിശ്വാസത്തിന്റെ ഉറപ്പ് ബൗദ്ധികവും സാമൂഹികവും ശാസ്ത്രീയവുമായ അനിശ്ചിതത്വങ്ങളോട് സംവദിക്കാൻ കഴിവുള്ളതാവണം. ഒരാളുടെ ബുദ്ധിക്കു ലഭിക്കുന്ന വ്യക്തതയിലെ ഉറപ്പല്ല വിശ്വാസത്തിന്റെ ഉറപ്പ്. വിശ്വാസത്തിന്റെ ഉറപ്പ് ക്രിസ്തുവിനെ ജീവിതത്തിലേക്ക് പങ്കു ചേർക്കലാണ്, മാത്രവുമല്ല അത് വ്യക്തിപരമായി ചുരുക്കാനാവാത്തതും സമൂഹം മുഴുവന്റെയും കൂട്ടുത്തരവാദിത്തവുമാണ്.

വിശ്വാസത്തിന്റെ ഉറപ്പ് ക്രിസ്തുവിലുള്ള ഉറപ്പാണ്. നമ്മുടെ മാനുഷികതയെ സ്വന്തം ശരീരമാക്കി നമ്മിൽ സന്നിഹിതനായിരിക്കുന്ന, ക്രിസ്തുവിലുള്ള ഉറപ്പ്. വിശ്വാസം എന്നത് മതാചാരങ്ങളായി ചുരുക്കപ്പെടുന്നതിലെ അപാകത വിസ്മരിക്കാവുന്നതല്ല. ക്രിസ്തു നമ്മിലായിരിക്കുന്നത് രക്ഷ ജീവിക്കുന്ന അനുഭവമാക്കിക്കൊണ്ടാണ്. ആ ഉറപ്പിന്മേലെ ദൈവരാജ്യത്തിന്റെ ആസ്വാദനവും ദൈവം സ്നേഹമാണെന്ന അറിവും ഉറപ്പിക്കാനാകൂ.