വിശ്രമിക്കാത്ത ദൈവത്തിന്റെ വിശ്രമത്തെക്കുറിച്ചുണ്ടാക്കിയ ഒരു ആചാരമൂല്യമല്ല ക്രിസ്തു സാബത്തിൽ കണ്ടത്. വിമോചനത്തിന്റെ ആനന്ദം ആഘോഷിക്കപ്പെടേണ്ട ദിവസമായാണ് ക്രിസ്തു സാബത്തിനെ സമീപിച്ചത്. മണവാളൻ ഉള്ളപ്പോൾ ഉപവാസമടക്കം മതപരമായ എല്ലാ നിഷ്ഠകളും ഒഴിവാക്കപ്പെട്ടിരുന്നതുപോലെ, ക്രിസ്തുസാന്നിധ്യം ഉള്ളിലറിയുന്നവർക്ക് ഉപവസിച്ചു വിശ്രമിക്കാനല്ല, ഉണർന്ന് പ്രവർത്തിക്കാനാണ് ക്രിസ്തുവിന്റെ വിളി. ക്രിസ്തുവിൽ തൊട്ടറിയപ്പെടുന്ന ദൈവഹൃദയം നമ്മിലോരോരുത്തരിലും വരാൻ ആ സാബത്ത് കാരണമാകും. പ്രതിഫലം നേടാനായിട്ടല്ല, മറിച്ച്, ദൈവരാജ്യത്തിലെ ഉത്തരവാദിത്തങ്ങളുടെ നിവർത്തിക്കലായി. അതുകൊണ്ടാണ്, ക്രിസ്തീയദർശനത്തിൽ ഉപവാസത്തിന്, പ്രീതിപ്പെടുത്തുന്ന ഭക്തിമാനത്തേക്കാൾ, സഹതപിക്കുകയും ഐക്യദാർഢ്യവും നൽകുന്ന നീതിയുടെ മാനമുള്ളത്.
വിമോചനമെന്നത് വിപ്ലവവും വെല്ലുവിളിയുമായി കണ്ട് കുറ്റം വിധിക്കുന്നവരുണ്ട്, എന്നാൽ വിമോചനം, രക്ഷയുടെ സമഗ്രതയുടെ ഭാഗമാണ്. ദൈവരാജ്യം പടുത്തുയർത്തപ്പെടുന്നത് ഈ വിമോചനം മനുഷ്യനിൽ തുറന്നിടുന്ന സുവിശേഷമൂല്യങ്ങളിൽനിന്നാണ്. അനീതിയുടെ കെട്ടുകൾ പൊട്ടിക്കാതെ, മർദ്ദിതർക്കു മോചനമുണ്ടാകാതെ, അനാഥർക്കും സംരക്ഷണം ഉറപ്പാക്കാതെ ദൈവരാജ്യം വിദൂരതയിൽ കാണുന്നത് മായക്കാഴ്ചയാണ്. വിമോചനം അലോസരപ്പെടുത്തുന്നത്, നിയമങ്ങളെ സ്വന്തം കാൽച്ചുവട്ടിൽ കൊണ്ടുവന്നിട്ടുള്ളവരാണ്. മനുഷ്യന്റെ അന്തസിനോട് ചേർത്ത് നിർത്തി, അധ്വാനത്തിനുള്ള തോട്ടം എന്ന നിലയിൽ സ്വകാര്യസ്വത്തുസമ്പാദിക്കുന്നത് ന്യായമായി കാണുന്നത്. എന്നാൽ അതുകൊണ്ട്, ജനത്തെ ചൂഷണം ചെയ്യാനും, ആട്ടിയോടിക്കാനും ഭൂമി സ്വന്തമാക്കാനും ശ്രമിക്കുന്നവർ തോട്ടത്തിൽ ചെയ്യുന്നത് അധ്വാനമല്ല കൊലപാതകമാണ്.
ദൈവരാജ്യം വിമോചനത്തിന്റെ അനുഭവം ആ ചൂഷിതർക്കു നൽകുന്നതാണ് സുവിശേഷവും ക്രിസ്തുവിന്റെ സാബത്തും. സുവിശേഷം, ചൂഷണം ചെയ്യുന്നവരുടെ കുത്തകയാകുമ്പോൾ ദുഷിക്കുന്ന വിശ്വാസസംവിധാനങ്ങളുമുണ്ടാകും. പീഡിപ്പിക്കുന്നവരെ സംരക്ഷിക്കുന്ന നിയമത്തിനു മുമ്പിൽ മൗനം അവലംബിച്ചു സമരസപ്പെടുമ്പോൾ നീതിക്കുവേണ്ടിയുള്ള ആബേലിന്റെ നിലവിളി കേൾക്കാതെയാവുന്നില്ല, കേട്ട് കൊണ്ടും പരിഹസിക്കപ്പെടുകയാണ്. നാബോത്തിന്റെ രക്തത്തെപ്രതി ഏലിയാ പ്രതികരിച്ചപ്പോൾ അത് രാജാധികാരത്തെയും, ആ ദുഷിച്ച അധികാരം നടപ്പിലാക്കിയ മതസംവിധാനങ്ങളെയും കൂടി വെല്ലു വിളിച്ചു. രക്ഷയുടെ മാനം വിമോചനത്തിന്റെ സ്വാതന്ത്ര്യാനുഭവമാകുമ്പോൾ അതിനെതിരായി നിന്നത് മതം തന്നെയായിരുന്നു എന്നതാണ് വിശ്രമത്തിന്റെ സാബത്തിന്റെ ദൂഷ്യത.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ