ദൈവമെന്തെന്നോ ആരെന്നോ അതിന്റെ പൂർണതയിൽ ഒരു സൃഷ്ടിക്കും മനസിലാക്കാനാവില്ല. ഏതെങ്കിലും പേരിലേക്ക് ചുരുക്കാനുമാവില്ല. അതുകൊണ്ടാവണം ദൈവത്തിന്റെ പേരായി "ഞാനെന്താണോ അതാണ് ഞാൻ" എന്ന് ദൈവം പറഞ്ഞത്. ആയിരം പേരുകൾ പോലും മതിയാവാതെ വരുന്നതുകൊണ്ടാവണം സഹസ്രനാമ വർണ്ണനകൾ പല പാരമ്പര്യങ്ങളിലുമുള്ളത്. അക്ഷരങ്ങളിലല്ല, ഹൃദയനൈര്മല്യത്തിന്റെ ആഴത്തിലേ (trust and intimacy) ദൈവത്തെ അറിയാനാകൂ. ആ അറിവിലേ ദൈവത്തിന്റെ പേരറിയാനാകൂ.
ദൈവത്തെക്കുറിച്ച് മനുഷ്യൻ അറിയേണ്ടതും, സ്വന്തം ജീവിതത്തെ എങ്ങനെ സമ്പൂര്ണമാക്കണമെന്നുമുള്ളത് യേശുവിൽ നിന്നറിയാം. വചനം മാംസം ധരിച്ചു നമുക്കിടയിൽ വസിച്ചതാണ്. ദൈവം ഉച്ചരിച്ച വാക്കല്ല വചനം, ദൈവം പ്രവർത്തിക്കുന്നതും സകലതും ദൈവത്തിലേക്ക് ചരിക്കുന്നതുമായ വഴിയാണ് വചനം.സകലനാമരൂപങ്ങളും, ജനിമൃതികളും, ബോധോദയവും, സംസ്കാരങ്ങളും, പ്രപഞ്ചഗതികളും ഉൾക്കൊള്ളുന്നതാണ് ആ വചനം. മതപാരമ്പര്യങ്ങളുടെ നിർവചനങ്ങളിൽ ഒതുക്കാനാവുന്നതല്ല വചനം. പതിയെ രുചിച്ചറിയേണ്ട ഹൃദയബന്ധമാണ് വചനം.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ