"ശത്രുക്കളെ സ്നേഹിക്കുവിൻ, നിങ്ങളെ പീഢിപ്പിക്കുന്നവർക്കു വേണ്ടി പ്രാർത്ഥിക്കുവിൻ." തന്നെത്തന്നെ സാധൂകരിക്കുവാനായി ഒരു നിയമജ്ഞൻ ചോദിച്ചു: ആരാണ് എന്റെ ശത്രു? ഞാൻ നല്ലവനും എല്ലാവരാലും ആദരിക്കപ്പെടുന്നവനുമാണല്ലോ?
അപ്പോൾ അവൻ ഒരു ഉപമ പറഞ്ഞു: സക്കേവൂസ് ചായ കുടിക്കുവാൻ ഒരു ചായക്കടയിൽ ഇരിക്കുകയായിരുന്നു. വേറൊരുവൻ അതിലെ വന്നു. സക്കേവൂസിനെ കണ്ടാൽത്തന്നെ വഴി മാറി പോകുന്ന ആളാണ്. എവിടെ ചെന്നാലും അവിടെയൊക്കെ ഈ നശിച്ചവൻ കാണും എന്നും പറഞ്ഞ് അയാൾ അകത്തു കയറാതെ പോയി. മറ്റൊരാൾ വന്നു. നല്ല ചിരിയൊക്കെ നൽകി സക്കേവൂസിനെ അയാൾ അഭിനന്ദിച്ചു. നമ്മടെ നസറായൻ വീട്ടിലൊക്കെ വന്നു അല്ലെ, ഭാഗ്യം. നന്നായി കേട്ടോ. പിന്നെ കാണാം. പുറത്തേക്കിറങ്ങുമ്പോൾ അയാൾ പറയുകയാണ് വീട്ടിൽ കേറ്റാൻ പാടില്ലാത്ത വകയാണ്. ആ തച്ചനാണെങ്കിൽ ഈ വക പോക്ക് കേസുകളുടെ കൂടിയേ കൂടൂ. അടുത്തയാൾ വന്നു. ആരെക്കൊണ്ടൊക്കെ ലാഭമുണ്ടാക്കാൻ കഴിയും എന്ന് നോക്കി നടക്കുന്നയാളാണ്‌. കൈയിൽ പണമുണ്ടായിരുന്ന സക്കേവൂസിനെ പരമാവധി ഉപയോഗിച്ച ആളാണ്. ചെറു പുഞ്ചിരിയുമായി അയാൾ അകന്നു. ഇയാളെക്കൊണ്ടൊന്നും നാടിനോ സമുദായത്തിനോ ഒരു ഉപകാരവുമില്ല എന്നൊരു ആക്ഷേപവും. ഇവരിൽ ആരാണ് സക്കേവൂസിനു ശത്രു ആയിരിക്കുന്നത്?
നീ അങ്ങനെയാവരുത്! ഒരുവനെ കണ്ടാൽ അവഗണിക്കുന്നതിലും, പരദൂഷണം പറയുന്നതിലും, അവന്റെ വഴിയിൽ തടസം സൃഷ്ടിക്കുന്നതിലും, സൗഹൃദം നടിച്ചു ചൂഷണം ചെയ്യുന്നതിലും, നല്ലമുഖം വെച്ച് സമൂഹകലഹം സൃഷ്ടിക്കുന്നതും ശത്രുവിന്റെ സ്വത്വരൂപമാണ്.
പേപ്പട്ടിയെ പിടിക്കാൻ കുറച്ചു പേ പിടിപ്പിക്കണം എന്ന യുക്തി ഉള്ളവരുണ്ട്. എന്നാൽ നിങ്ങൾ തെരഞ്ഞെടുക്കപ്പെട്ട ജനമാണെന്ന പേര് വഹിക്കുകയും, എന്നാൽ അത് യാഹ്‌വെയുടെ ആരാധനകളിലേക്കു ചുരുങ്ങുകയും ചെയ്യുമ്പോൾ നിങ്ങൾക്ക് എന്ത് മേന്മയാണുള്ളത്? നന്മ ചെയ്യുന്നതിൽ നിങ്ങൾ മുന്നിട്ടു നില്കുന്നില്ലെങ്കിൽ നിങ്ങൾക്ക് എന്ത് മേന്മയാണുള്ളത്? നന്മയായതു പഠിക്കുക, ശീലിക്കുക, സത്യമായതു പഠിപ്പിക്കുക പ്രോത്സാഹിപ്പിക്കുക. അല്ലെങ്കിൽ നിങ്ങൾക്ക് എന്ത് മേന്മയാണുള്ളത്?
എങ്ങനെയാണ് മുന്നിട്ടു നിൽക്കേണ്ടത്? നമ്മൾ മുന്നിട്ടു നിൽക്കുന്നിടത്ത് ക്രിസ്തു പ്രതിഫലിക്കുന്നുണ്ടോ? അതിൽ സുവിശേഷാംശമുണ്ടോ? മത്സരങ്ങളുടെ ലോകത്താണ് നമ്മൾ. നമ്മൾ ഏർപ്പെട്ടിട്ടുള്ള മത്സരരംഗങ്ങൾ ഏതൊക്കെയാണ്? അവിടെ പ്രതിയോഗികൾ ആരൊക്കെയാണ്? നമുക്കുള്ളിൽത്തന്നെ നടക്കുന്ന മത്സരങ്ങൾ ഏതൊക്കെയാണ്? മതം ബിസിനസ് ഏറ്റെടുക്കുകയും ബിസിനസ് വിശ്വാസം ഏറ്റെടുക്കുകയും ചെയ്യുന്നു, രോഗസൗഖ്യം, ക്ഷേമം എന്നിവ ഉറപ്പു വരുത്തുന്നത് ആര്? ഏർപ്പെട്ടിരിക്കുന്ന സാമൂഹികവും വിശ്വാസപരവുമായ മേഖലകളിൽ ഉയർത്തിക്കാട്ടപ്പെടുന്ന മൂല്യങ്ങൾ ഏവ? തെരഞ്ഞെടുക്കപ്പെട്ട ജനമായിക്കൊണ്ട് നന്മ, സമാധാനം, സാഹോദര്യം എന്നിവ ആഗ്രഹിക്കാനാകുന്നില്ലെങ്കിൽ നിങ്ങൾക്ക് എന്ത് മേന്മയാണുള്ളത്? ഈ മത്സരത്തിൽ എന്താണ് എങ്ങനെയാണ് നമ്മൾ വിതരണം ചെയ്തുകൊണ്ടിരിക്കുന്നത്?
സ്നേഹത്തിലധിഷ്ഠിതമായ ശുശ്രൂഷയാണ് ക്രിസ്തുവിനെ വെളിപ്പെടുത്തുന്നത്. അതിനെയാണ് സേവനം എന്ന് വിളിക്കുന്നത്. മൂന്നു തരത്തിലുള്ള സേവനങ്ങളെ പരിശോധിക്കാം. ഉദ്യോഗസ്ഥനിലയിലുള്ള സേവനത്തിൽ സ്നേഹവും നന്മയും ഓരോരുത്തരുടെയും മനോഭാവത്തെ ആശ്രയിച്ചാണ്. ഉദ്യോഗങ്ങൾ ഉറപ്പാക്കുന്നത് സ്ഥാപനങ്ങളുടെ സുസ്ഥിരതയാണ്, സ്ഥാപനഘടനകളുടെ നിലനില്പാണ്, ശുശ്രൂഷ നിർബന്ധമില്ല. രണ്ട്, മറ്റുള്ളവരുടെ നന്മക്കു വേണ്ടി ത്യാഗപൂർണ്ണമായ അധ്വാനം. മൂന്ന്, നിർബന്ധിതമായ ദാസ്യത. അവിടെ വേതനമോ, മനുഷ്യാന്തസോ കാര്യമാക്കപ്പെടുന്നില്ല. അനീതിയുടെ അടയാളമാണ് അത്തരം ദാസ്യത. ഏതുതരം സേവനമാണ് നമ്മൾ നൽകുന്നത്? നിങ്ങൾക്ക് എന്ത് മേന്മയാണുള്ളത്? നേർക്കുനേർ കാണാവുന്ന യാഥാർത്ഥ്യമായി അനീതിയുടെ ദാസ്യത നമുക്ക് മുമ്പിലുണ്ട്. അവരിൽ നീതിയും സത്യവും മനുഷ്യാന്തസ്സും യാഥാർത്ഥ്യമാക്കുവാൻ നമ്മുടെ സേവനങ്ങൾക്ക് കഴിയുന്നുണ്ടോ? നമ്മുടെ സേവനങ്ങളും ഉദ്യോഗസ്ഥശൈലിയിലേക്കു മാറിപ്പോയിട്ടുണ്ടോ? അത്തരം അവസ്ഥയെ പിന്താങ്ങുന്നതാണോ നമ്മുടെ സേവനരംഗങ്ങൾ?
സുവിശേഷാംശമുള്ള സേവനരംഗങ്ങൾ നന്മയും സാഹോദര്യവും ആഗ്രഹിക്കും. സുവിശേഷാംശമില്ലാത്ത പദവികളും പ്രസംഗങ്ങളും സ്ഥാപനങ്ങളും ക്രിസ്തീയമല്ല.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ