ഭക്തിയോ ആരാധനയോ അല്ല നമ്മൾ ആഗ്രഹിക്കുന്നത്. നമ്മൾ തേടുന്നത് ആധിപത്യമാണ്. എണ്ണത്തിലും, സാമൂഹിക പ്രാതിനിധ്യത്തിലും അംബരചുംബികളായ സ്ഥാപനങ്ങളിലും തിളങ്ങി നില്കുന്നത് ആ ആധിപത്യമാണ്. ആധിപത്യം കൊണ്ട് ദൈവജനത്തെ രൂപീകരിക്കാനോ വളർത്താനോ ആവില്ല. ശുശ്രൂഷയുടെയും ത്യാഗത്തിന്റെയും മാതൃകകൾ ക്രിസ്തു കാണിച്ചു തന്നത് അതുകൊണ്ടാണ്.
ക്രിസ്തുവുള്ളിടത്താണ് സഭയുള്ളത്. ക്രിസ്തുവിനെ മാറ്റി നിർത്തുന്ന സമൂഹത്തെ സഭയെന്നു വിളിക്കാനാവില്ല. 'എന്റെ നാമത്തിൽ' ഒരുമിച്ചു ചേരുന്നത് ഒരു ബാനറിന്റെ കീഴിൽ ഒത്തുകൂടുന്നതോ ആ പേരിൽ കീർത്തനം പാടുന്നതോ അല്ല. ക്രിസ്തുചൈതന്യത്തിൽ ഒരുമിച്ചു ചേരുക എന്നതാണ് അതിന്റെ അർത്ഥം. അവനിൽ ഒരുമിച്ചു ചേരുമ്പോഴാണ് ദേവാലയം ഉണ്ടാകുന്നത്, ആരാധനയും.
ആധിപത്യവും വിധേയത്വവും അടിസ്ഥാനമാക്കിയാണ് കുടുംബത്തെപ്പോലും ചിലപ്പോൾ വിവരിക്കുന്നത്. എന്തിന്, ദൈവത്തെപ്പോലും അത്തരമൊരു ബന്ധത്തിന്റെ രൂപത്തിലാണ് എളുപ്പത്തിൽ ഇട്ടു കൊടുക്കുന്നത്. അടിസ്ഥാനഘടകങ്ങൾ എന്തിൽ വച്ചുറപ്പിച്ചിരിക്കുന്നോ അതാവും ആ സമൂഹം പാലിച്ചു പോരുക. ശുശ്രൂഷ ചുരുക്കം ചിലർക്ക് വേണമെങ്കിൽ ശ്രമിക്കാവുന്ന മൂല്യമായിരിക്കുന്നു. ശിഷ്യരുടെ അടയാളമായിട്ടാണ് ക്രിസ്തു ശുശ്രൂഷയെ കാണിച്ചു തന്നത്. ആധിപത്യത്തെക്കുറിച്ച് നിങ്ങൾ അങ്ങനെ ആവരുതെന്നും.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ