ആരാണ് മാറ്റം ആഗ്രഹിക്കാത്തത് ?

നിഷേധാത്മകമായ കാഴ്ചപ്പാടും, ശരീരത്തോടുള്ള അവജ്ഞയും പലകാരണങ്ങൾ കൊണ്ട് കൂടുതൽ ഇഷ്ടപ്പെടുമ്പോൾ, അതിനെ പിന്താങ്ങുന്ന ആത്മീയതകളും രൂപപ്പെടും. സാമൂഹികമോ ചരിത്രപരമോ ആയ പശ്ചാത്തലവും അതിനു കാരണമായേക്കാം. എക്കാലത്തും അത് ആകർഷകമാണ് എന്നതാണ് വിചിത്രകരമായ സത്യം. മാറ്റുന്ന കാര്യങ്ങളിലെ കുറവുകൾ കണ്ടുകൊണ്ട് വീണ്ടും സ്വയം കുറ്റപ്പെടുത്താവുന്നതരം മാറ്റങ്ങളാണ് കൂടുതലും നമ്മൾ ഏറ്റെടുക്കുന്നത്. എന്നാൽ ഒരു വളർച്ച മുന്നിൽ കണ്ടുകൊണ്ട് ഉത്തരവാദിത്തങ്ങൾ ഏറ്റെടുക്കേണ്ടവ സൗകര്യപൂർവം മാറ്റി നിർത്തുകയും ചെയ്യുന്നു. 

14 -15 നൂറ്റാണ്ടുകളിലുണ്ടായ black death ന്റെയും 1915 - 18 ലുണ്ടായ Spanish flue ന്റെയും മറ്റും പശ്ചാത്തലത്തിലും, സാമൂഹികമായ അധാർമിക അത്യധികം വളർന്നെന്നു കാണപ്പെട്ട പശ്ചാത്തലങ്ങളിലും മരണത്തെയും നരകാഗ്നിയെയും അന്ത്യവിധിയെയും ഉയർത്തിക്കാണിക്കുന്ന പ്രസംഗങ്ങൾ പ്രബലമായിരുന്നു. ഏറ്റവും ഹീനമായ ശരീരപീഡകൾ ഏറ്റെടുക്കുക എന്നതായിരുന്നു മാനസാന്തരത്തിന്റെയും വിശുദ്ധജീവിതത്തിന്റെയും അടയാളം. Jean Delumeau ടെ Sin and Fear ഈ നിഷേധാത്മക സമീപനത്തെക്കുറിച്ച് വ്യക്തമായ ധാരണ നൽകുന്ന ഒരു കൃതിയാണ്. ഈ കാഴ്ചപ്പാടിനെ അടിസ്ഥാനമാക്കിയ അനേകം ആത്മീയ ഗ്രന്ഥങ്ങളും ആ കാലഘട്ടങ്ങളുടേതായി ഇന്നും നിലവിലുണ്ട്. ഉദാത്തമായ ക്രിസ്തീയ ആത്മീയതയായി അവയെ ഉയർത്തിക്കാണിക്കുന്നവരുമുണ്ട്. എന്നാൽ അതിലെ സ്വയം ശിക്ഷിക്കുകയെന്ന ആകർഷണീയതയാണ് അവയിൽ പ്രവർത്തിക്കുന്നതെന്ന് തിരിച്ചറിയേണ്ടത് ആരോഗ്യപരമായ വളർച്ചക്ക് ആവശ്യമാണ്. 

പല തുണ്ടുകളായി കിടന്നിരുന്ന ഇറ്റലിയും, രാഷ്ട്രീയവും സാമ്പത്തികവുമായ അസ്വസ്ഥതകളും ഡാന്റെയുടെ കൃതികളിലുണ്ട് Divine Comedy, Purgatory). ഇംഗ്ലണ്ടിൽ മതത്തിലുണ്ടായ മാറ്റങ്ങളും, രാഷ്ട്രീയമായ അട്ടിമറികളും John Milton ന്റെ കൃതികളിലുണ്ട് (Paradise Lost, Paradise Regained). ക്രിസ്തീയ ഭാവനകളെ ഈ കൃതികളുടെ സ്വാധീനം ചെറുതല്ല, മാത്രമല്ല, അങ്ങനെ തന്നെയാണ് സ്വർഗ്ഗവും നരകവും ശുദ്ധീകരണ'സ്ഥലവും' എന്ന തരത്തിലാണ് കരുതിപ്പോരുന്നത്. അടുത്തകാലത്തുള്ള ഏതാനം ദർശനങ്ങളും സമാനമായ ഭാവനാരൂപീകരണത്തിനു വഴിവച്ചിട്ടുണ്ട്.

സമാനമായി, ആ കാലഘട്ടത്തിലെ വിശുദ്ധരുടെ ജീവിതങ്ങളിൽ അവർ പാലിച്ചു പോന്ന നിഷ്ഠകളെ, അവർ വിശുദ്ധരായതു കൊണ്ട് മാത്രം എല്ലാവർക്കും എല്ലാക്കാലത്തേക്കും അനുകരണീയമായ പ്രവൃത്തികളായി പ്രോത്സാഹിപ്പിക്കപ്പെടുന്നില്ല. അവരുടെ നന്മപ്രവൃത്തികളും, ക്രിസ്തുവിനോടുള്ള സമാനതകളുമാണ് അനുകരണീയമാക്കേണ്ടത്. വിശുദ്ധരുടെ ജീവിതത്തെ സംബന്ധിച്ച് അവരോടുള്ള ഭക്തിയിൽ രൂപപ്പെട്ട ജനപ്രിയമായ പുരാവൃത്തങ്ങളുണ്ട്. അവയെ ചരിത്രപരമായ വസ്തുതകളിൽ നിന്നും വേർതിരിച്ചു കാണുവാനും ഇന്ന് ആ ജീവിതങ്ങളെ അറിയാൻ ശ്രമിക്കുന്ന നമ്മൾ പരിശ്രമിക്കണം.